Айдоочуну аткан инспектордун коркконуна карабай ал №1 тергөө абагына которулду

БИШКЕК, 27-авг. — Sputnik. Сокулук айылынын тургуну Тилек Шабаевдин өлүмү боюнча айыпталып жаткан Чүй облусунун ИИББ Жол кайгуул кызматынын инспектору Вахиджан Салимбаев убактылуу кармоочу жайдан Бишкектин №1-тергөө абагына которулду.

ИИМдин маалыматына ылайык, үстүбүздөгү жылдын 11-июнунда болжол менен кечки саат 9.30да Жол кайгуул кызматынын инспектору "Ниссан Альмеро" үлгүсүндөгү унаанын 23 жаштагы айдоочусу Тилек Шабаевди атып салган. Кызматкердин айтымында, Шабаев жолдо кызыл жарыктан өтүп кеткен. Окуя Беловодск айылында катталган. Октон өлгөн Шабаев менен бирге унаанын ичиндеги кесиптештери алардын милиция менчик унаа менен кууганын билдиришкен. 

"Салимбаев №1-тергөө абак жайына которулууну каалаган эмес, анткени ал жерде ушул жылдын апрель айында Салимбаев тарабынан кармалган кылмышкер отурат", — дейт Шабаевдердин адвокаты Зарина Рамазанова.

Жактоочу инспектордун адвокаты Салимбаевдин УКМКнын тергөө абак жайына которулушун өтүнгөн арыз менен кайрылган. Мамлекеттик комитет аталган өтүнүчтү канааттандырган эмес.

"10-август күнү Москва райондук прокуратурасынын тергөөчүсү бир катар экспертизанын жыйынтыгы жок болгондуктан, Салимбаевдин тергөө жана камакта калуу мөөнөтүн узартуу боюнча сунуш берген", — деди Рамазанова.

Бул Салимбаевдин курал колдонгон биринчи учуру эмес экени белгилүү болду. Буга чейин Кара-Балта шаарынын тургуну Владимир Шейкин жолдун туура эмес жеринен өткөнү үчүн аталган инспектор экөөнүн ортосунда чыр чыгып, натыйжада Салимбаев ага карата ок чыгарганын билдирген.