Митинг эртең менен Бишкек шаарында жайгашкан Чүй облустук сотунда болду. Курман болгон 23 жаштагы Тилек Шабаевдин туугандары "сот чечими менен күнөөкөрдү эркиндикке чыгарып жибериши мүмкүн" деп шектенип жатат.
КРдин Ички иштер министрлигинин расмий маалыматында Жол кайгуул кызматынын инспектору Вахиджан Салимбаев "Ниссан Альмеро" автомашинасын айдап бараткан 23 жаштагы Тилек Шабаевге ок аткан. Алардын маалыматында, бала автоунаасы менен кызыл жарыкка токтобой өтүп кеткен. Бул окуя Чүй облусунун Беловодское айылында болуп, күбөлөрдүн айтымында, милиционер Шабаевди себепсиз аткан. Москва райондук сотунун санкциясынын негизинде инспектор Бишкектеги №1 СИЗОго камакка алынган. Учурда тергөө иштери уланып жатат.
Митингге келген Шабаевдин 30га жакын тууганы Вахиджан Салимбаев Москва райондук сотунун чечимине макул болбой, Чүй облустук сотуна арыз менен кайрылгандыгын айтышты. Инспектор облустук сотко камакка алууну башка чарага алмаштырууну суранып арыз жазган.
