БИШКЕК, 20-авг. — Sputnik. Бишкектин акча алмаштыруу жайлары теңгени 20 тыйындан сатып алып жатса, ал эми доллардын баасы кээ бир жерлерде 65 сомго чыгып кетти. Казак премьер-министри Карим Масимовдун мамлекеттин эркин курска өтүү жөнүндө билдирүүсүнөн улам кыргыз валюта рыногу ушундай өзгөрүүлөрдү жасады.
Кыргызстандын акча алмаштыруу жайлары казак валютасын 32 тыйындан сатып, 20 тыйынга баалап алып жатат. Эртең менен эле теңгенин баасы 33 тыйынды түзүп турган. Доллардын наркы айрым жерлерде 65 сомго чейин жетти. Учурда америка валютасы 63,2 сомдон алынууда. Шаршемби күнү эле бул көрсөткүч 61,5 сомдун чегинде болчу.
Коммерциялык банктар да теңгенин баасын кескин төмөндөтүштү. Учурда казак валютасы 20 тыйындан алынып, 33 тыйындан сатылып жатат. Ал эми 62 сомдон алынып жаткан долларды учурда 64 сомдон сатып алууга болот.
КР Улуттук банкынын курсу боюнча теңге 33 тыйынга, доллар 62 сомго бааланууда.
