БИШКЕК, 15-авг. — Sputnik. Милиция кызматкерлери адашып кеткен эже-сиңдилердин туугандары табылганын ИИМдин маалымат кызматы билдирди.
Маалыматка ылайык, 12-августта милиция бөлүмүнө түнкү саат 11лерде беш жана жети жаштагы бир тууган кыздарды алып келишкен. Аларды Садыгалиев жана Дэн Сяопин көчөлөрүнүн кесилишинен тургундар табышкан.
Эртеси күнү милиция кызматкерлери аталган аймактан сураштырып, алардын жашаган жерин табышкан. Үйдө кыздардын 52 жаштагы чоң энеси болгон. Кыздар жоголуп кеткен учурда ал жумушта болчу. Неберелерин карап тур деп алардын улуу агасына табыштап кеткен. Кечинде ал кыздарды өз алдынча издеп, бирок милицияга кайрылган эмес.
Кыздардын атасы 2012-жылы каза болуп, апасы Ысык-Көлдө иштеп жүргөнүн аныкталган.
Кыздардын чоң энеси менен түшүндүрүү иштери жүргүзүлүп, алар үйүнө кайтарылды.
