БИШКЕК, 10-авг. — Sputnik. Кыргызстандын Евразиялык экономикалык биримдикке кошулушу менен эмгек миграциясында жүргөн кыргызстандыктар тил сынагынан, тарыхты билүү боюнча сынактардан толук бошотула турганын эмгек, миграция жана жаштар министринин орун басары Алмаз Асанбаев билдирди.
Ал ошондой эле Кыргызстандын университеттери берген дипломдор ЕАЭБге мүчө мамлекеттерде тааныла турганын кошумчалады.
"Кыргызстандын дипломдору төрт мамлекетте таанылат жана ЕАЭБге мүчө өлкөлөрдө алар туруктуу жана жакшы кызматтарда иштөөгө мүмкүнчүлүк түзүлүп жатат. Ошондой эле алардын укугун коргоо жагы да жакшырды", — деди ал.
Расмий маалыматтарга ылайык, Россияда 500 миңден ашуун, Казакстанда 70 миңден ашык кыргызстандык иштеп жүргөнүн министрдин орун басары билдирип, эмгек миграциясына эң көп өлкөнүн түштүк аймагынан кетип жатканын айтты.
"Эмгек миграциясына эң көп Баткен облусунан кеткен. Бул жактагы 35 пайызында үй-бүлөнүн жок дегенде бир мүчөс иштегени кеткен. Ал эми Жалал-Абад жана Ош облустарында бул көрсөткүч 22-27 пайызды түзөт. Өлкөнүн түндүк тарабында эмгек миграциясынын агымы анчейин байкалбайт. Чүй, Ысык-Көл, Нарын, Талас облустарында жана Бишкек шаарында чет жакка иштеп кеткендер 1-5% пайызга чейин жетет", — деди ал.
ЕАЭБ мамлекеттеринин чек арасы ачылгандан кийин эмгек мигранттарына жакшы шарттар түзүлө тургандыктан, алардын агымы мындан да көбөйүшү мүмкүндүгүн айтып, аларды Кыргызстанда туруктуу жумуш орундарын түзүү менен кармап калуу аракеттери жүрүп жатканын айтты. Алдын ала божомолдоолорго ылайык, 50-60 миңге чейинки адам эмгек миграциясына кетиши ыктымал дейт министрдин орун басары.
