БИШКЕК, 7-авг. — Sputnik. Кыргызстанда ишембиге караган түнү уюлдук операторлордун абоненттеринин SIM-карталары өчүрүлөт.
Beeline компаниясынын расмий билдирүүсүнө ылайык, эртең SIM-карталарды каттоо токтотулуп, номерлерди өчүрүү башталат.
"Каттоодон өтпөгөн абоненттер чала албайт, чалууларды да кабыл ала албайт. Билдирүүлөрдү жибере албайт, мындан тышкары, мобилдик интернет жеткиликсиз болот. Ошондуктан номерлерди каттоодон өткөрүү керек", — деп айтылат билдирүүдө.
Ушундай эле эскертүүсүн MegaCom компаниясы да өз социалдык түйүнүндө жарыялаган.
"КР өкмөтүнүн токтомуна ылайык, каттоодон өтпөгөн SIM-карталар 8-августтан баштап бардык байланыш кызматынан өчүрүлөт", — дейт компания.
Мындай талап менен "О" уюлдук компаниясы да макул экенин билдирип, бул тууралуу өзүнүн баракчасына жарыялаган.
SIM-карталарды жекелештирүү өткөн жылы башталып, үстүбүздөгү жылдын 8-мартында аяктамак. Бирок уюлдук компаниялардын өтүнүчү менен каттоо мөөнөтү 8-августка чейин узартылган.
MegaСom компаниясынын 2,3 миллион абонентинин 79,08 пайызы катталган.
Ал эми "О" уюлдук компаниясынын кызматы менен 1,7 миллион жашоочу пайдаланса, анын 90,47 пайызы каттоодон өткөн.
Кыргызстандыктардын SIM-карталарын каттап жетишпей жаткандыктан, уюлдук компаниялар Мамлекеттик байланыш агенттигине каттоо мөөнөтүн дагы узартуу өтүнүчү менен кайрылышкан.
