БИШКЕК, 7-авг. — Sputnik. Шайлоого керектүү жаңы программадагы жабдууларды текшерүү учурунда базага чогултулган маалымат менен паспорттун бири-бирине дал келбеген фактылар аыкталганын шаардык мэрия билдирет.
Мэриянын аппарат жетекчиси Нурдин Тынаевдин айтымында, тестирлөөнүн жүрүшүндө базадагы маалымат менен ички паспорттун бири-бирине шайкеш келбеген учурлары аныкталган. Мындан улам мэрия жарандарга аты-жөнүн аймактык шайлоо комиссиясынан текшерүүгө чакырат.
"Тизмеде аты-жөнүн өз маалында тактоо шайлоо учурунда бир катар көйгөйлөрдүн алдын алууга мүмкүнчүлүк берет. Базада катталбаган жарандар биометрикалык маалымат тапшырып, эч тоскоолдуксуз парламенттик шайлоого катыша алат", — дейт Тынаев.
Биометрикалык маалымат республика боюнча 2014-жылдын август айында чогултула баштаган. 16 жаштан жогору болгон бардык жарандар бармак издерин, санарип сүрөтүн жана электрондук кол тамгасын тапшырууга милдеттүү. Жалпысынан Кыргызстан боюнча 3 миллион 641 киши жеке маалыматтарын тапшыруусу керек деп болжонууда.
