БИШКЕК, 4-авг. — Sputnik. Кыргыз-тажик чек арасында болгон окуяны жумушчу топ иликтей турганын вице-пермьер-министр Абдырахман Маматалиев Sputnik агенттигине билдирди.
Дүйшөмбү күнү, 3-августта Баткен облусунун чек арага жакын жайгашкан Көк-Таш айылында жергиликтүү тургундар ортосунда чыр чыккан.
"Жумушчу топ учуп кетти. Анын катарында делимитация жана демаркация боюнча катчылыктын мүчөлөрү да бар. Алар бардык нерсени иликтешет. Тажик тарап да ушундай эле иштерди аткарат", — деди вице-пермьер-министр.
Чыр-чатак чыккан аймакта абалды турукташтыруу үчүн КР күч түзүмдөрүнүн бардык бөлүктөрү жүрөт. Тажикстандын күч түзүмдөрү да ушундай эле иштерди жүргүзүүдө.
"Мен тажикстандык коллегам менен бир нече жолу сүйлөштүм, ал кызматкерлерине ушундай эле тапшырмаларды берди", — дейт ал.
Коргоо жана коопсуздук боюнча вице-премьер аталган аймакта атышуу болгонун четке кагып, жарадар болгондор жок экенин айтты.
