БИШКЕК, 4-авг. — Sputnik. Кыргызстанда август айында аба-ырайынын кескин өзгөрүүсүнө байланыштуу табигый процесстердин жанданышы күтүлөрүн Өзгөчө кырдаалдар министрлиги билдирет.
Маалыматка ылайык, бул бир катар кыйынчылыктар менен коштолот.
"Аба-ырайы температурасынын туруксуздугу, катуу шамал, тоолуу аймактарда узакка созулган жаан-чачын сел жүрүшүн, суу каптап, жер көчкүнүн болушун шарттайт", — деп айтылат билдирүүдө.
Мындан улам дарыяларда суунун деңгээлине ар дайым көзөмөл жүргүзүп, тийиштүү иш-чараларды жүргүзүү зарылдыгы курч турары белгиленүүдө.
Буга байланыштуу министрликтин алдындагы өзгөчө кырдаалдарды башкаруу борбору жарандык коргоо кызматтарын жана бардык күчтөрүн ыкчам даярдыкта туруу тапшырмасын берди.
