БИШКЕК, 31-июль — Sputnik. Облустук прокуратура тарабынан Жалал-Абад сот-медициналык бюросунун жетекчилигине карата кылмыш иши козголгонун Башкы прокуратуранын маалымат кызматы билдирди.
Маалыматка ылайык, облустук сот-медициналык экспертиза бюросунун жетекчилиги 2011-2015-жылдардын аралыгында райондук бөлүмдөргө иштебеген кызматкерлерге айлык акы которуп келген. Мындан улам, мамлекетке 700 миң сомдон ашуун зыян келтирилген.
Облустук прокуратура аталган мекеменин жетекчилигине Кылмыш жаза кодексинин кызмат абалынан кыянаттык менен пайдалануу, документтерди жасалмалоо, ишенип берилген мүлктү өз кызыкчылыгына пайдалануу, алдамчылык беренелеринин негизинде кылмыш ишин козгоду.
Учурда иликтөө иштери жүрүп жатат.
