БИШКЕК, 30-июль — Sputnik. Алтайдагы Федералдык коопсуздук кызматы аталган аймакта туруктуу жашап, бирок "Ислам мамлекети" уюмунун катарына өтүп, Сирияга кетем деген Кыргызстандын жаранына тыюу салды. Муну аталган аймактын жергиликтүү ЖМКсы чыккан маалыматты Sputnik агенттигине Алтайдагы Федералдык коопсуздук кызматы тастыктады.
Атайын кызматтын өкүлдөрү ал кишиге расмий түрдө эскертүү берип, бул аракети менен кылмыш кылууга бара жаткандыгын түшүндүргөн.
Алтайдагы Федералдык коопсуздук кызматы анын Сирияга кетүү боюнча бир нече ирет жар салып, "Ислам мамлекетинин" катарына кирип, кошо согушуу ниетин билдиргендигин аныктап чыккан.
"Бул максатта ал аталган террордук уюм боюнча материалдар менен таанышып, Сирияга кетүү жолдорун жана видеолорду интернеттен көрүп жүргөн", — деп айтылат маалыматта.
Бул боюнча Кыргызстандын УКМКсына кайрылганыбызда, азырынча комментарий бербей тургандыгын айтышты.
Буга чейин интернетке "Ислам мамлекетинин" мүчөсүмүн деген кишинин кыргызстандыктарга жасаган видео кайрылуусу тарап кеткен. Анын чындыкка канчалык дал келерин УКМК текшерип, ал Жалал-Абад облусунда туулган жаран экендигин аныктаган. Азырынча ал жарандын кайсы жерде жүргөндүгү тактала элек.
