БИШКЕК, 30-июль — Sputnik. Чүй облусундагы Ала-Арча суусу көтөрүлүп, Сейил гүл багын каптоо коркунучу жаралганын Өзгөчө кырдаалдар министрлигинин маалымат кызматы билдирди.
Учурда Ала-Арча дарыясы секундуна 26,2 кубометр агууда. Ал эми Аламүдүн суусу секундуна 23,8 кубометр көлөм менен агып, коркунуч сакталууда.
Сейил гүл багын суу каптоо коркунучу жаралгандыктан, Ала-Арча дарыясынын жээктерин бекемдөө иш-чаралары башталды.
Андан сырткары, суунун Электрик, Труд дачаларына жакын жээктери бекемделди. Жумушка ӨКМдин "ХОВО" үлгүсүндөгү төрт самосвалы, бир жүктөгүч, бир кран, райондук суу чарба башкармалыгынан бир жүктөгүч, бир экскаватор тартылган.
