БИШКЕК, 29-июль — Sputnik. Премьер-министр Темир Сариев Кемин районундагы "Талды-Булак Сол Жээк" кениндеги алтын кен комбинатынын ачылышына катышып жатып, бул Кыргызстандын экономикасындагы орчундуу окуя деп атады.
"Пайдалуу кендердин запастары боюнча мамлекеттик комиссиянын маалыматына ылайык, бул жерде 60 тоннадан ашык алтын бар. Мындан тышкары кенде болжолдуу түрдө ушунча күмүштүн запасы бар. Ошондуктан, "Талды-Булак Сол Жээкти" өздөштүрүү Кыргызстандын экономикасы үчүн олуттуу мааниге ээ", — деди Сариев.
Анын айтымында, келечекте комбинаттын төлөй турган салыгы 400 миллион сомдун тегерегинде болуп, миңдеген адамдар иш менен камсыздалат.
"2011-жылдан 2015-жылга чейин мамлекеттик бюджетке 500 миллион сомдон ашуун салык төлөдү, эми ишке кирген соң жыл сайын 400 миллион сом салык төлөй турган болсо, анын 50 миллиону жергиликтүү бюджетке түшмөкчү. Муну менен катар миңден ашык адам жумуш менен камсыз болот, анын 80 пайыздан ашыгы жергиликтүү тургундардан алынат. Быйыл жыл аягына чейин комбинат 1 тонна 2 кг. алтын өндүрүүсү пландалууда", — деди өкмөт башчы.
"Талды-Булак Сол Жээк" кени өткөн кылымдын 60-жылдары эле чалгындалып, 1990-жылдан тарта аны өздөштүрүүнүн техникалык-экономикалык негиздемесин иштеп чыгуу жана кенге инвесторлорду тартууга аракеттер жасалып келген.
