БИШКЕК, 25-июль — Sputnik. Министрликке Жол кайгуул кызматын (ЖКК) Мамлекеттик автоинспекция (МАИ) деп которуу сунушу түшүп жатканын bчки иштер министри Мелис Турганбаев коллегия жыйынында билдирди.
Анын айтымында, кызматтын аталышы жөн гана өзгөрүп тим болбостон, бүтүндөй ИИМ системасында кеңири реформалар жүргүзүлөт.
"Реформаларга карай биринчи кадам жасалды. Алдыда ИИМ системасын толук өзгөртүү күтүлүүдө. Бул үчүн айлык акыны жогорулатып, материалдык-техникалык базаны чыңдоо зарыл. Эгер ЖКК эки күн чыкпай калса, көчөлөрдө баш аламандык өкүм сүрөт", — деди министр.
Коллегия жүрүшүндө быйылкы жылдын биринчи жарым жылдыгында 3 011 жол кырсыгы катталганы, бул өткөн жылкыга караганда 6 пайызга аз экени белгиленди. Кырсыктын кесепетинен 424 адам набыт кетип, 4 387 адам түрлүү жаракат алган.
