БИШКЕК, 20-июль — Sputnik. Ишкерлерди карактап, өздөрү атайын кызматта иштейбиз деп ири суммадагы акча талап кылган уюшкан кылмыштуу топ кармалганын ИИМдин маалымат кызматы кабарлайт.
Маалыматка ылайык, үстүбүздөгү жылдын июнь айынын аягында ИИМге беш миң долларын тартып алып, өзүн сабап кеткен азиат улутундагы белгисиз адамдарга карата чара көрүү арызы менен шаар тургуну кайрылган.
Ишти иликтөөгө министрликтин Уюшкан кылмыштуулукка каршы күрөшүү кызматы алган.
Натыйжада каракчылардын аты-жөнү такталып, алардын УКМКга тиешеси жок экени аныкталган. Эки күндүн аралыгында топтун бардык мүчөлөрү колго түшүрүлдү. Учурда кармалган Чүй облусунун жана Бишкек шаарынын төрт тургунунун башка кылмыштарга тиешеси аныкталууда. Маалыматтарга караганда, кармалгандардын бирөө Бишкек шаары боюнча салык кызматынын башкармалыгында иштейт, ал эми үчөө эч жерде иштебейт.
