БИШКЕК, 16-июль — Sputnik. Бишкектеги Эмен багында "Жаштар Жусуп Мамайды окуйт" аттуу акция өтүп, ага премьер-министр Темир Сариев катышканын өкмөттүн маалымат кызматы билдирди.
Сариев Кытайдагы кыргыз манасчысы Жусуп Мамайдын кыргыз маданияты, көркөм өнөрүндөгү орду чоң экенин белгиледи.
"Манасты эл духуна айланткан кытайлык кыргыз бир боорлорубуздун туу башы Жусуп Мамай атабызга адамдык таазимибизди, көкүрөк сүйүүбүздү билдиргибиз келет. Биз бүгүн залкар Жусуп Мамайды гана эмес, кыргыздын духуна, рухуна, улуу затына сугарылган ХХ кылымдын улуу манасчысын эскерип отурабыз”-деди Премьер-министр.
Өлкө башчы Жусуп Мамайдын Кытайда ардак менен аталып, бийик урмат, жогорку сыйга ээ болгонун белгиледи. Ошондой эле, Манас аркылуу ири өлкөдө өз атын, кыргыз деген затын, кыргыздын рухун сактап келаткан Кытайдагы кыргыздарга ыраазылыгын билдирди.
Акциянын жүрүшүндө "Манас" эпосун жайылтууга салым кошкон студенттерге Жусуп Мамайдын версиясынын негизинде басылып чыккан "Манас" эпосунун жети томдук жыйнагын белек кылды.
