Кыргыз-тажик чек арасынын аймагында 6-июлда эки чатак чыккан

Жазылуу
Исфара районун Чорку айылындагы чатакты жетип келген Тажикстандын укук коргоо органдарынын кызматкерлери токтотуп, кыргызстандыктарды чек ара аймагына чейин узатып коюшкан.

БИШКЕК, 7-июль — Sputnik. Баткен облусунда 6-июлда чек ара аймагында кыргыз-тажик чатагы чыккан учурда, Тажикстандын аймагында да чыр болуп, жергиликтүү тургундар Чорку айылы аркылуу автоунаа менен өтүп бара жаткан кыргыздарга кол салган. Бул туурасында Мамлекеттик чек ара кызматы маалымат таратты.

Алар Баткен шаарынан чыгып, Көк-Таш айылына багыт алган. Тажикстандын аймагынан өткөн кыргызстандык үч жаран таяк жеп, автоунаасынын айнеги талкаланган. 

"Окуяны жетип келген Тажикстандын укук коргоо органдарынын кызматкерлери токтотуп, кыргызстандыктарды чек ара аймагына чейин узатып коюшкан", — деп билдирди Чек ара кызматынын маалымат кызматы. 

Маалымат кызматы бул окуядан кийин эки тараптын чек кара кызматтарынын өкүлдөрү өз аймактарында жергиликтүү элге түшүндүрүү иштерин жүргүзүшкөндүгүн билдирди.

Ушул эле күнү, 6-июлда Баткен облусунун Көчө-Карын айыл аймагында кыргыз-тажик мамлекеттик чек арасындагы эки тарап кагылышып кетип, ок атылган.

Жаңылыктар түрмөгү
0