БИШКЕК, 6-июль — Sputnik. СССР учурунда абактан качып, кармала элек кишилер азыркыга чейин изделүүдө. Бул туурасында Жазаларды аткаруу мамлекеттик кызматынын маалымат кызматы билдирди.
Республика боюнча эркинен ажыратылган кылмышкерлерди издөө боюнча күчөтүлгөн иштер жарыяланды.
Маалымат кызматтын билдирүүсүндө, Жазаларды аткаруу мамлекеттик кызматы 2015-жылдын 8-июнунан 1-июлуна чейин башка күч түзүмдөрү менен бергилекте ыкчам иликтөө иштери жүргүздү. Жыйынтыгында, абактан качкан 50 адамдын турган жери аныкталып, алар кайра кармалган.
Жазаларды аткаруу мамлекеттик кызматынын маалымат кызматы аталган ведомствонун каттоосунда СССР учурунда абактан качып кеткендер турганын, издөөдө жүргөндөрдүн жалпы саны 1809 киши экендигин билдиришти.
