БИШКЕК, 1-июль — Sputnik. Издөөгө алынган Казакстандын эки жаранынын бирөө кармоо учурунда өзүн-өзү жардырып өлдү. Бул тууралуу Улуттук коопсуздук боюнча мамлекеттик комитеттин маалымат катчысы Рахат Сулайманов билдирди.
26-июнда Бишкек шаарынын борбордук бөлүгүнөн абактан качып кеткен жарандардын турган орду аныкталып, аларды кармоо аракети болгон. Бирок, кылмышкерлерди кармоо учурунда алар ок чыгарып, бирөөсү гранатаны жардырам деп коркутуп, изин жашырып качып кетишкен болчу. Казакстандын жарандары 24 жаштагы Альберт Абхин Сатыбалды углы жана 27 жаштагы Жанболот Амировду 2014-жылы Бишкек шаарынын Биринчи Май райондук соту бир нече кылмыш жасаганы үчүн эркинен ажыраткан.
Маалыматка ылайык, бүгүн, 1-июлда түнкү саат үчтөр чамасында 24 жаштагы Альберт Абхинди кармоо учурунда анын колундагы граната жарылып каза болгон. Анын денесинин бөлүктөрүн Бишкек шаарынын Ленин районундагы Кривоносов көчөсүнөн табышкан.
Издөөгө алынган Жанболот Амировду издөө улантылууда.
