БИШКЕК, 4-июль — Sputnik. Премьер-министр Темир Сариев баштаган өкмөт мүчөлөрү медицина кызматкерлеринин кесиптик майрамына арналган веложүрүшкө жана спорттук иш-чараларга катышканын өкмөттүн маалымат кызматы билдирди.
Өкмөт мүчөлөрү Бишкек шаарындагы Дайыр Асанов атындагы Жеӊиш паркынан Эски аянтка чейин веложүрүш жасады.
Сариев медицина кызматкерлерин кесиптик майрамы менен куттуктап, спорт жана дене тарбиянын жалпы өлкө үчүн маанисин белгиледи.
"Ден соолугу чыӊ адам жалпы өлкөнүн байлыгы. Дени сак улут гана кубаттуу, өнүккөн мамлекет кура алат. Ошондуктан, спорт менен дене тарбияга олуттуу мамиле кылып, өз ден соолугубузга кам көрсөк жалпы мамлекет үчүн пайда келтиребиз", — деди ал.
Андан соӊ Бишкектеги Эски аянтта 900гө жакын адамдын катышуусу менен дене тарбия көнүгүүлөрү жасалды.
