БИШКЕК, 22-июнь — Sputnik. Транспорт жана байланыш министрлигинин бюджети 770,9 миллион сомго көбөйгөнүн Каржы министрлиги билдирет.
2015-жылга карата республикалык бюджетке киргизилген өзгөртүүлөргө ылайык, Транспорт жана коммуникация министрлигинин атайын каражаттын эсеби менен такталган бюджети 3 миллиард 149,8 миллион сомду түздү. Министрликтин бюджети 770,9 миллион, ал эми атайын каражат 23 миллион сомго көбөйдү.
Кошумчаланган каражаттын 13 миллиону жол тармагында иштеген жумушчулардын айлык акысын жогорулатууга, 20 миллиону санариптик телеберүү үчүн ресиверлерди алууга, 50 миллиону Ош — Баткен — Исфана автожолунун "Көк-Талаа — Пүлгөн" бөлүгүн курууга жумшалат. Акчанын 687,9 миллион сом өлчөмүндөгү негизги бөлүгү өлкөнүн ЕАЭБге кирүүсүнө байланыштуу Кыргызстандын маалымат системасын түзүү, жабдуу жана киргизүү жаатындагы иштерге сарпталмакчы.
