БИШКЕК, 24-июнь — Sputnik. АКШ элчилигинин "дипломатиялык жүгү" Кыргызстанга 23-июнь күнү келгенин Тышкы иштер министрлигинин расмий өкүлү Нурлан Сүйөркулов тастыктады.
Буга чейин маалымат булактар жүк шейшемби күнү таңкы саат үчтө келип, аэропорт аймагынан эртең мененки саат беште алынып чыкканын билдирген.
"Жүктүн келери тууралуу тийиштүү нота бар. ТИМ коомчулуктун кооптонуусун жакшы түшүнөт, бирок тынчсызданууга негиздүү себеп болушу керек. АКШнын Кыргызстандагы элчилигинин маалыматы боюнча аталган жүк элчиликтин жаңы имараты үчүн пайдаланылат", — дейт өкүл.
Сүйөркуловдун айтымында, аталган жүк Кыргызстандагы абалды туруксуздаштыра тургандыгы жөнүндө маалымат жок.
"Жүк кечигип келди. Буга аны өз убагында жөнөтпөгөн америкалык тарап күнөөлүү", — деди ал.
Сүйөркулов мындай жүктөр Кыргызстанга мамлекеттин мыйзамына ылайык бардык тийиштүү процедуралардан өткөндөн кийин гана киргизиле турганын белгиледи.
"Бул тартип КРде аккредитациядан өткөн бардык чет элдик өкүлчүлүктөргө тиешелүү. Бардык мамлекеттер дипломатиялык жүк жиберет. Ушундай эле тажрыйба Кыргызстандын чет жердеги өкүлчүлүктөрүнө жиберилген жүккө карата да ошол мамлекеттер тарабынан колдонулат", — деп түшүндүрдү Сүйөркулов.
Март айында украин авиакомпаниясынын АН-124 "Руслан" унаа учагы "Манас" аэропортуна эки жолу келип конгонун ММК жазып чыккан. Учак Бириккен Араб Эмирлигинен АКШ элчилиги үчүн 152 тонналык "кандайдыр бир жүк" алып келген. Дипломатиялык почта болгондуктан, ал текшерилген эмес.
2015-жылдын февраль айында АКШнын КРгы убактылуу элчиси болуп Ричард Майлз дайындалган. Кыргызстан менен Грузия эксперттери бул дайындоонун кокустук эмес экенин, ал мамлекетке кооптуулук жаратарын айтышууда.
Майлз элчилик милдетти Азербайжан, Белград жана Болгария мамлекеттеринде аркалаган. 2003-жылы Грузияда "роза төңкөрүшү" болгон учурда да Майлз аталган өлкөдө Американын элчиси болуп турганы белгилүү.
