БИШКЕК, 20-июнь — Sputnik. Ош облусунун казысы Ниязали Арипов Кара-Суу районундагы Төлөйкөн айыл өкмөтүндөгү "Жалгыз-Бак" мечитинин жамааты менен жолукандан кийин, аймакта "Үлгүлүү мечит" сынагын өткөрүүнү чечти. Бул туурасында Ош облустук мусулмандар казыятынын маалымат кызматы билдирди.
Облус казысы келген жамаатты орозо айы менен куттуктап, андан сырткары, казы "Жалгыз-Бак" мечитинин ички абалы, оңдоп-түзөө иштери менен таанышты. Мечиттеги заманбап шарттагы китеп текчелер, конок тосуу бөлмөсү, ашкана, отургузулган кооз гүлдөр жана аквариумдагы балыктардын өстүрүлүшү намазга келгендерди кайдыгер калтырган жок. Эмгек жамааты буга мечит имам-хатиби Сардорбек Обидовдун эмгекчилдиги себеп экенин айтышты.
Мындай жакшы саамалыкка күбө болгон облус казысы башка мечиттердин да мындан үлгү алуусу үчүн "Үлгүлүү мечит" сынагын өткөрүү туурасындагы ниетин билдирди.
