БИШКЕК, 18-июнь — Sputnik. Жыл аягына чейин 43 мектеп пайдаланууга бериле турганын Дамира Ниязалиева Жогорку Кеңештин пленардык жыйынында билдирди.
Анын айтымында, учурда республика боюнча 191 мектеп курулуп жатат. Ошондой эле ал акыркы эки жылда бала бакчалардын имараттарын кайтаруу боюнча алгылыктуу иштер жасалып жатканын кошумчалады.
"Өлкө боюнча 1568 бала бакча болсо, анын 285и мамлекеттики, 992си муниципалдык жана 291и менчик. Учурда 119 бала бакчанын имараты кайтарылган", — деди ал.
Ниязалиева мектепке чейинки билим берүү тармагында коррупцияны жок кылуу үчүн тийиштүү кадамдар жасалып жатканын айтты. Бүгүнкү күнү бала бакчага кирүү үчүн Ош шаарында 1700 бала, Бишкек шаарында 1549 бала кезекте турат.
"Капиталдык салым" беренеси боюнча жыл аягына чейин 43 мектептин жана 2 бала бакчанын курулушу аяктарын ал баса белгиледи.
