Баткендин сот департамент башкармалыгы өзү мыйзам бузуп, 1,6 млн. сом зыян алып келген

БИШКЕК, 18-июнь — Sputnik. Баткен облусунун сот департамент башкармалыгы кызматтык абалынан кыянаттык менен пайдаланып, мамлекетке 1 миллион 600 миң сом зыян келтиргенин УКМКнын маалымат кызматы билдирди.

Сот департамент башкармалыгы 2014-жылдын декабрында Баткен жана Кадамжай райондорундагы сот имараттарын, ошондой эле Баткен шаарындагы райондор аралык соттун имаратын оңдотуу боюнча "Бай-Тоо" ишканасы менен  1 миллион 963 миң сомго келишим түзүлгөн. 

Эсептөө палатасынын маалыматына ылайык, аталган имараттар толук оңдолуп бүтпөстөн, анын баалары мурдагыдан да жогорулатып көрсөтүлгөн. Кадамжай райондук сотунун жана Баткен шаарындагы райондор аралык соттун имаратын оңдоо иштери башталган эмес. "Бай-Тоо" ЖЧКсы которулган каражатты башка максаттарга колдонгон.

Мындай мыйзамсыз аракеттерден улам, мамлекетке 1 миллион 595,1 миң сом зыян келтирилген.

Аталган факты боюнча Башкы прокуратура Кылмыш жаза кодексинин "Кызматтык абалынан кыянаттык менен пайдалануу" жана "Сатып алуулар, аукцион же тендерди өткөрүүнүн тартибин бузуу" беренелери боюнча кылмыш ишин козгоду.