БИШКЕК, 18-июнь — Sputnik. Президент Алмазбек Атамбаев кыргызстандыктарды ыйык Орозо айынын башталышы менен куттуктады.
Президент бул ыйык айда асыл тилектер, улуу максаттар кабыл болушун чын-жүрөктөн кааларын билдирди. Кең пейилдүүлүк менен кечиримдүүлүк, береке менен жакшылык айы болгон орозо да кирип келгендигин айтты.
"Бул күндөрдү ар бир мусулман баласы чын пейилден күтөт эмеспи. Ыйык Орозо айында ар бир инсан күнүмдүк түйшүктөрдөн, көр оокаттан башты жыйып, Улуу Жаратканга тобо келтирет, күндөр мааниси жок текке кетип жаткан жокпу, башкаларга жакшылыгым, мээримим тийдиби деп өмүрдүн маңызы тууралуу ойлонушу зарыл. Орозо баарыбызды тынчтыкка, сабырдуулукка жана ынтымакка үндөйт, жакшы жөрөлгөлөргө, боорукерликке жана тазаланууга жол ачат", — деди президент Атамбаев.
Ал куттуктоосунда сүйүктүү Кыргызстаныбызда бейпилдик, биримдик, бакубатчылык өкүм сүрүшүн тилей тургандыгын кошумчалады.
