БИШКЕК, 12-июнь — Sputnik. Республика аймагында жекшемби жана дүйшөмбү күндөрү туруксуз аба ырайы күтүлүп жатканын ӨКМдин маалымат кызматы Кыргызгидрометке таянуу менен билдирет.
Маалымат боюнча, Кыргызстандын аймагында мезгил-мезгили менен нөшөрлөгөн жаан жаап, тоолуу аймактарда кар жаашы мүмкүн.
Айрым жерлерде батыштан соккон шамалдын ылдамдыгы секундасына 19-24 метрге чейин жетет.
"Чүй, Талас облустарында күндүз абанын температурасы +18…+23 градус, Ош, Жалал-Абад жана Баткен облустарында +22…+27, ал эми тоолуу райондордо +3…+8 градуска чейин төмөндөйт", — деп айтылат билдирүүдө.
Мындан тышкары нөшөрлөгөн жаандан улам тоолуу аймактарда сел жүрүү коркунучу бар экенин министрлик кошумчалады.
