БИШКЕК, 9-июнь — Sputnik. Баткен облусунун Лейлек районунда 8-июнда кечинде нөшөрлөгөн жамгырдын натыйжасында бир нече айылда суу каптап, бир катар үйлөрдү, талааларды сел алып кеткен.
Кечээги сел Кулунду айыл аймагындагы төрт айылдагы 60 үйдү, бир орто мектепти каптап кеткен. Ал эми Разаков айыл аймагындагы он, Аксуу айылындагы төрт турак үйдү короо жайы менен кошо, ал эми Бешкент айыл аймагындагы 143 үйдү каптаган. Андан сырткары, айыл чарба аянттарын суу алып, жол менен арыктарга кум, шагыл толуп калган.
Селден жабыркагандарга түнкү саат ондордон тарта аталган ӨКМдин жергиликтүү бөлүмүнүн кызматтары куткаруу жана кесепеттерин жоюу иш-чаралары баштагандыгын министрликтин маалымат кызматы билдирди.
"2015-жылдын 9-июнунда таңкы саат саат 01:40да ӨКМден 50 комплект чатыр, 250 даана одеяло, 50 комплект ашкана буюмдары жана 50 куту гигиеналык керектелүчү буюмдар жөнөтүлдү. Үйүн суу каптагандар ӨКМ жөнөткөн чатырларда баш калкалап турушат", — деп маалымдады учурда Лейлекте жүргөн ӨКМдин маалымат катчысы Абдышарип Бекилов.
Ал эми сел каптаган Булак-Башы орто мектебинде окуу процесси убактылуу токтолду.
Өзгөчө кырдаалдар министри Кубатбек Боронов жаратылыш кырсыгы болгон аймакка жөнөп кетти.
