БИШКЕК, 28-май – Sputnik. Бишкектин бардык соода түйүндөрүндө насвай сатууга тыюу салынарын мэриянын керектөөчүлөр укугун коргоо жана керектөөчүлөр рыногун өнүктүрүү боюнча бөлүмүнүн жетекчиси Айжан Жакшылыкова билдирди.
Швед окумуштууларынын изилдөөсү боюнча, насвайдын курамында хром, никель, кадмий, коргошун жана мышьяк бар. Ал онкологиялык оорулардын себепчиси болушу да толук мүмкүн.
Жакшылыкованын айтымында, насвай сатууга тыюу салууну Бишкек шаардык кеңеши демилгелеп жатат.
"Биздин бөлүм борбор калаанын аймагында соода кылуу эрежелеринин жаңыланган долбоорун даярдап жатат. Ага Бишкектин аймагында насвай сатууга тыюу салуу шарты киргизилүүдө", — дейт жетекчи.
Жакшылыкова жергиликтүү өз алдынча башкаруу органдары өз аймактарында тамеки жана алкоголь ичимдиктерин сатууну жөнгө салууга укуктуу экенин айтты. Андан сырткары насвай чегилүүчү тамекиге да, кайсы бир продукциянын катарына да кирбегендиктен аны сатуудан алып салууга толук укуктары бар экенин кошумчалады.
"Насвай кай жерде канча көлөмдө сатылып жатканы баарыбызга эле белгилүү. Аны көбүнесе мектеп окуучулары чегип жатат. Казакстанда насвай сатууга тыюу салынды, биз да ошентишибиз керек", — деди Жакшылыкова.
Тыюу салууга таасир этүүчү жагдай — бул керектөөчүлөр укугу боюнча бөлүмдүн жоюлушу.
"Мэриянын жаңы түзүмүнө ылайык, биздин бөлүм жоюлуп, ыйгарым укутарыбыз райадминистрация бөлүмүнө жүктөлгөнү жатат. Эгер биз аталган мыйзам долбоорун даярдоого жетишпей калсак, насвай маселесин ким аягына чыгарары белгисиз", — деди бөлүм башчы.
Жакшылыкова насвай сатууга тыюу салуу эки айдан кийин күчүнө кириши мүмкүн экендигин кошумчалады.
