БИШКЕК, 15-май — Sputnik. Фучик паркындагы жер аянттарына карата 2007-жылдан бери ээлик кылуу жөнүндө мамлекеттик акт дар экендигин Sputnik кабарчысына мэриянын маалымат кызматынан Бишкек башкы архитектурага (ББА) таянуу менен билдиришти.
Социалдык тармактарда парк аймагындагы жер аянттары сатылып жатканы туурасындагы маалыматты коомчулук кызыл чеке болуп талкуулап жатат. КР мыйзамдарына ылайык, парктардын аймагындагы жерлерди сатууга тыюу салынган.
"Башкармалыктын архивинде аталган жер аянтында кандайдыр бир курулуш жүргүзүү жөнүндө эч бир долбоордук документ жок", — дешти Бишкек башкы архитектурасынан.
Азыркы учурда аталган маселени Ленин районунун прокуратурасы, жеке курулуш департаментаменти, Ленин райондук администрациясы жана Жергиликтүү өз алдынча башкаруу органдары карап жатат.
"Тартип бузууларды четтетип, мыйзамга ылайык укуктуктук тартипти орнотууну кеңеш кылабыз", — деп кошумчалашты аталган ведомствонун маалымат кызматынан.
Башкармалыктан аталган аянтта курулуш тосмолору орнотулуп, дарактар кыйылып жатканы туурасында социалдык тармактарында берилген маалымат анык экенин ырасташты.
Фучик сейил багы Бишкек шаардык администрациясынын 1992-жылдын 25-июнундагы токтому менен шаардын сейил бактар жана эс алуу жайлары бирикмесине учурдагы абалында пайдаланууга жана көрктөндүрүүгө тапшырылган. Сейил бактын аянты 7,41 гектарды түзөт.
Кыргыз өкмөтүнүн 1995-жылдын 30-октябрындагы токтому менен аталган сейил бак Бишкектин жергиликтүү өз алдынча башкаруу органдарына жана шаардын коммуналдык менчигине өткөрүп берилген.
Өкмөттүн 2002-жылдын 20-августундагы токтому менен сейил бак респубилкалык маанидеги тарыхый жана маданият эстеликтердин мамлекеттик тизмесине киргизилген. Мунун максаты "Тарыхый-маданий мурастарды сактоо жана пайдалануу жөнүндө" мыйзамга ылайык тарыхый-маданий мурастарды сактап калуу, алардын ар тараптуу жана натыйжалуу пайдаланылышын камсыз кылуу болчу.
2007-жылы болсо Трудовая көчөсүндөгү 1,2 гектар жер аянты Абдулдабеков аттуу жаранга ошол эле жылдын 16-апрелиндеги Бишкектин райондор аралык сотунун чечим менен менчикке берилип, мамлекеттик акт түзүлгөн.
Менчик ээсинин өзүнөн комментарий алуу азырынча мүмкүн эмес.
