БИШКЕК, 8-май — Sputnik. Өкмөт башчысы Темир Сариев шайлоого биометрикалык маалыматтарын тапшырган гана жарандар добуш бере ала тургандыгын билдирди. Бул туурасында ал Ош облусундагы иш-сапар учурунда Ош мэриясындагы жана шаардагы мекеме-уюмдардын жетекчилери, шаардык кеңештин депутаттары менен жолукканда шайлоо темасында сүйлөп жатып айтты.
"Шайлоого биометрикалык маалыматтарын тапшырган жарандар гана катыша алат. Бүгүнкү күндө жалпы республика боюнча түшүндүрүү иштери жүргүзүлүп жатат. Жергиликтүү өз алдынча башкару органдары менен кеңештер бул боюнча тыкыр иш алып барып, элге түшүндүрүшү зарыл. Бул биздин өлкөдө таза жана ачык-айкын шайлоолорду өткөрүүгө жана туруктуулукту камсыз кылууга өзүнүн жардамын берет деп ишенем", — деди премьер-министр.
Сариев өкмөт башчылыгына шайланып жатканда да анын негизги милдеттеринин бири – Кыргызстанда күздө болуучу шайлоолорду тынч-аман өткөрүү экендигин айтылып, оңой эмес жоопкерчилик жүктөлгөн.
Бул туурасында талапкер болуп туршганда Сариев өзү да айтып, эгер өкмөт башчы болуп кала турган болсо, күзүндө өтчү парламенттик шайлоого катышпай турганын айткан.
