БИШКЕК, 4-май — Sputnik. Издөөдө жүргөн кыргызстандык жаран аны чек арадан кармоо маалында жаңжал салганын КР Чек ара кызматынын маалымат кызматы билдирди.
Жекшемби күнү, 3-майда "Акжол" көзөмөл өткөрүү пунктунан ИИМ аркылуу издөөдө жүргөн жаранды чек арачылар кармады. Ал Казакстанга өтүүгө аракет кылган.
"Кармоо учурунда ал чатак чыгарып, көзөмөл өткөрүү пунктунун терезесин сындырып, айнек менен курсагын жаралаган. Аталган жарандын кармалгандыгы боюнча ИИМге маалымдалып, милицияга өткөрүлүп берилген", — деп айтылат чек ара кызматы тараткан билдирүүдө.
Жаранды кармоо учуру "Акжол" көзөмөл өткөрүү пунктунда орнотулган видеокамерага жазылып калгандыгын аталган мекемеден кошумчалашты.
