Дипломатиялык өкүлчүлүктүн маалымат катчысы Айымкан Кулукееванын айтымында, Екатеринбургдагы мекендештер өз маалыматтарын баарынан активдүү тапшырышты.
"Екатеринбург шаарындагы Кыргызстандын башкы өкүлчүлүгүндө 1 миң 990 адам каттоодон өттү, ал эми Новосибирск шаарындагы вице-консулдукта 837 жарандын биометриялык маалыматы алынды", — деди Кулукеева.
Аталган мезгил аралыгында Россияда Кыргызстандын 4 миң 507 жаранынан биометриялык маалымат топтолду деп белгиледи элчиликтин кызматкери.
Январь айында Мамлекеттик каттоо кызматынын маалымат кызматы РФте 18 миңден ашык мигрант биометриялык каттоодон өттү деп билдирген эле.
Мамлекеттик каттоо кызматынын коомчулук менен байланыш бөлүмүнүн башчысы Чынара Усупбаева жарыяланган маалыматтар чындыкка жатпайт деп билдирди.
"Чет мамлекеттердеги биометриялык маалыматтарын тапшырган жарандар жөнүндө маалымат топтоодо ката кеткен. Бул маалыматтарды эсепке албоону суранабыз", — деди Усупбаева.
Биометриялык маалыматтарды топтоо Кыргызстанда 2014-жылдын август айында башталган. Өлкөнүн 16 жаштан жогорку бардык жарандары бармактарынын изин, сан ариптик сүрөтүн жана жеке кол коюу үлгүсүн тапшырууга милдеттүү Маалыматты топтоо 2015-жылдын 1-августунда аякташы керек. Жалпысынан КРде болжол менен 3 миллион 641 миң адамдын жеке маалыматтарын алуу күтүлүүдө.
