Бишкек, 26-фев. — Sputnik. Бүгүн депутаттар "Кумтөр" долбоорунун ишине байланышкан ЖКнын токтомдорунун аткарылышы боюнча өкмөттүн маалыматын угуп жатат.
Учурда парламентке келген премьер-министр баштаган өкмөт мүчөлөрү маалымат берип жатат. Өкмөт башчысы Жоомарт Оторбаев депутаттардан "Центерра голд" менен келишим түзүүгө макулдук берүүнү сурады.
Депутаттар алдында сүйлөгөн вице-премьер-министр Валерий Диль эки тараптуу кеңешүү жана сүйлөшүү күнү-түнү жүрүп жаткандыгын билдирди.
"Сүйлөшүүлөр активдүү өтүп жатат. Кечээ эксперттер менен консультация саат таңкы бешке чейин уланды. Сүйлөшүүлөр, иш-процесстер боюнча 300-350 барак документтер топтолгон. Реструктуризация жүргүзүү боюнча иштер ачык өткөрүлөт. Көз карандысыз жана жергиликтүү эксперттер тартылган. Кыргыз тараптын кызыкчылыгын болушунча коргогонго аракет кылып жатабыз",— деди Диль.
Февралдын башында министрлер кабинети канадалык тарап менен биргелешкен ишкана түзүү боюнча макулдашууга келе электигин билдирген.
Кыргыз өкмөтү "Центерра голд" менен 50-50% үлүштө биргелешкен ишкана түзүү боюнча бир жылдан бери сүйлөшүү жүргүзүп келет.
