БИШКЕК, 11-фев — Sputnik. Анын айтымында, Салянованын "жогорку кызматтагы аткаминер катары башкы прокурорду көп күнөөлөр, имиштер жана уу-дуу кептер ээрчийт" дегени туура.
"Бир топ убакытка чейин анын чөйрөсүндөгү жакындарынын прокуратуранын ишине кийлигишүүсү туурасындагы маалыматтар анонимдүү болуп, имиш жана оозеки кептин деңгээлинде айтылып келди. Андыктан, Алмазбек Шаршеновичтин бул маалыматка карата мамилеси ошого жараша болду. Бирок, фактылар чыга баштаганда, мага белгилүү болгондой, Аида Жеңишбековнага жыйынтык чыгаруу сунуш кылынды. Албетте, президенттин "ушулардын баарынан кийин, сизге кантип ишенем" деген сөзүнөн соң, отставкага кетүү боюнча арыз жазылды. Мен Алмазбек Шаршенович башкачараак кадамды күткөндүгүнө ишенем. Бирок, менин пикиримде, президент күтпөгөн бүтүм жасалды", — деп билдирди мамлекет башчысынын кеңешчиси.
Экс-баш прокурор Салянова бүгүн, 11-февралда берген маалымат жыйынында президент Алмаз Атамбаевге өкүтүн билдирип, кызматты өз эрки менен таштабагандыгын, ал эми президент аны коргой албагандыгын айткан.
"Менимче, жогорку кызматтагы жана аткаминерлер менен күрөш жүргүзүп жатканда мамлекет башчысы Башкы прокурордун абсолюттук коопсуздугунун кепили болушу керек эле. Бирок, президент мага каршы турган күчтөргө туруштук бере алган жок", — деп билдирген бүгүнкү жыйында Салянова.
