БИШКЕК, 29-янв — Sputnik. Бишкек шаарына балдардын хирургиялык борборун куруу пландаштырылууда. Анын каржылык жагын Сауд Аравиянын өнүгүү фонду алышы мүмкүн. Саламаттыкты сактоо министри Талантбек Батыралиев Бишкек шаардык клиникалык тез жардам ооруканасына жаңы хирургиялык корпус куруу долбоорун ишке ашыруу үчүн Сауд Аравиянын өнүгүү фондунун өкүлдөрү менен жолукту. Бул тууралуу аталган министрликтин маалымат кызматы билдирди.
Жолугушуунун жүрүшүндө аталган долбоордун техникалык маселелери талкууланды.
Фонддун өкүлдөрүнүн айтымында, 5 кабат жаңы оорукана 400 орунга ылайыкташтырылат.
Имаратты курууга болжол менен 15 миллион доллар кетет. Ал эми 500 аталыштагы жабдууларды алууга 10 миллион доллар каралса, 270 аталыштагы инвентарларды алууга 5 миллион доллар сарпталат. Долбоордун жалпы баасы 30 миллион доллар деп бааланууда.
Долбоордун алкагында медициналык кызматкерлерди такай окутуп туруу үчүн шарт түзүү да каралган.
Заманбап технологияларды орнотуу менен ооруканада жатуу 30 пайызга чейин кыскарат. Жаңы төрөлгөн ымыркайлардын жана балдардын жүрөк кемтик оорулары маалында операция жасап, алардын өөрчүп кетүүсүн кыскартууга мүмкүнчүлүк түзүлөт. Аталган долбоор ишке ашып калса, пландуу операцияны күтүп жаткандардын мөөнөтү 1 айдан 5 күнгө чейин кыскарат.
Жаңы имаратты 2018-жылы бүтүрүү пландалууда.
