БИШКЕК, 31-дек — Sputnik. Россиянын 14 шаарында, анын ичинде Москвада да, темир жол вокзалдарынын имараттарында орнотулган жардыргычтар тууралуу телефон аркылуу билдирүүлөр полициянын нөөмөт бөлүмүнө жарым саат бою келип жатты деп билдирет РИА Новости Москванын күч структураларындагы маалымат булагына таянуу менен.
"02 номерине тынчсызданган телефон чалуулар 30-декабрда саат 18.55тен тартып келе баштаган. Анда Москва, Самара, Оренбург, Омск, Нижний Новгород, Пенза, Новосибирск, Казань шаарларынын темир жол вокзалдарынын имараттарында орнотулган жардыргычтар тууралуу билдиришкен. Жардыруулар бардыгы болуп Россиянын 14 шаарында коюлганын билдиришти. Акыркы билдирүү саат 19.30да келип түштү", — деп айтып берди агенттиктин маектеши.
"Билдирүүлөрдүн көпчүлүгү Украинадан жана баары темир жол вокзалдарынан келди. Борбордогу Ленинград вокзалында азыр текшерүү жүрүп жатат", — деп сөзүн аяктады күч ведомствосунун кызматкери.
Укук коргоо органдарынан мындай маалыматтарды расмий ырастоолор РИА Новостиге келген жок.
Кыргызстане "телефондук терроризм" үчүн каралган жаза
КРнын Кылмыш жаза кодексинин 228-беренесине ("Терроризм аракети жөнүндө атайылап жалган билдирүү") ылайык, "даярдалып жаткан жардыруу, өрт коюу же адамдардын өмүрүнө коркунуч жаратуучу, мүлккө олуттуу зыян келтире турган же башка оор кесепеттерге алып келүүчү иш-аракеттер жөнүндө атайылап жалган билдирүү үчүн 180 — 240 саат коомдук иш же 100 — 500 эсептик көрсөткүчкө барабар айып төлөө, же эки жылдык мөөнөткө түзөтүү ишке тартуу, же үч жылга чейин эркинен ажыратуу жазасына тартылат".
