БИШКЕК, 31-дек — Sputnik. Батыш Африкадан 29-декабрда кайтып келген медицина кызматкерлеринин бири Эбола оорусуна чалдыкканын Шотландия өкмөтү ырастады деп билдирет РИА Новости.
Бүткүл дүйнөлүк саламаттык сактоо уюмунун (БДСУ) маалыматы боюнча, 20-декабрга карата Эбола геморрагиялык безгек оорусунан каза болгондордун саны дүйнө боюнча 7 миң 373 адамга, ал эми жугузуп алгандардын саны 19 миң 31 адамга жеткен.
Эбола геморрагиялык безгек оорусу — оорулуу адамдан анын каны жана башка бөлүп чыгуулары аркылуу, ошондой эле ал адамдын колдонгон буюмдары аркылуу жуга турган айыкпас дарт. Эболаны айыктыра турган атайын дароо ыкмасы же ага каршы эффективдүү вакцина жок, бирок жылдын башында оору пайда болгондон бери ага даба болчу келечектүү дарылардын иштелип чыккан тууралуу АКШнын, Япониянын жана Канаданын өндүрүүчүлөрү билдирген. БДССУ сыноодон өтүп жаткан дарыларды ооруну айыктырууга колдонуу орундуу деп тапкан.
Эбола безгеги — катуу жугуштуу оору, ал тез жугат жана оор абалда өтүп, көп өлүмгө алып келет, ошондой эле геморрагиялык синдромдун өрчүшүн (тери геморрагиясын жана былжыр челдердин каноосун) да пайда кылат. Оорунун өлүмгө алып келүү коэффициенти 90 пайызга жетет. Эбола негизинен Борбордук жана Батыш Африканын тропикалык токойлорго жакын аймактарында чыгып жатат.
