БИШКЕК, 10-дек — Sputnik. УКМКнын Коррупцияга каршы күрөшүү кызматы "Кыргызнефтегаз" ААКтын жаратылыш газын белгиленген ченемден көп коротконун аныктаган. Бул тууралуу комитеттин басма сөз кызматы билдирди.
Маалыматка ылайык, "Кыргызнефтегаз" ААКтын жооптуу кызматкерлери Кочкор-Ата шаарындагы акиташ чыгаруучу цехтерге газ сатууда белгиленген ченемден 883 миң 275 кубометр газды көп коротуп, 5 миллион 420 миң сомдук зыян алып келген.
Аталган факты боюнча Жалал-Абад облусунун Ноокен райондук милициясынын тергөө бөлүмү Кылмыш-жаза кодексинин 171-беренеси ("Ишенип берилген мүлктү коротуу же ээлеп алуу") жана 221-беренеси ("Коммерциялык жана башка уюмдардын кызматкерлеринин өз укуктарын кыянаттык менен пайдаланышы") боюнча кылмыш ишин козгоду.
