БИШКЕК, 9-дек — Sputnik. Президент Алмазбек Атамбаев Катар мамлекетине расмий сапарынын алкагында Катардын Эмири Тамим Бин Хамад Аль Тани, ири инвесторлор менен жолугуп, кызматташуу боюнча жети документке кол коюлду. Бул туурасында президенттин маалыматтык саясат бөлүмү билдирди.
Алмазбек Атамбаев менен Тамим Бин Хамад Аль Тани соода-экономикалык, инвестициялык жана маданий-гуманитардык тармактарда өз ара иштешүүнү активдештирүү зарылчылыгын белгилешти.
Мамлекет башчысы Кыргызстандын евразиялык мейкиндиктеги интеграциялык процесстерге кошулуусу өлкөгө Евразиялык экономикалык биримдигине мүчө өлкөлөрдүн 200 миллиондук рыногуна тоскоолсуз кирүүгө мүмкүнчүлүктөрдү ача тургандыгын айтты. Алмазбек Атамбаев ошондой эле Кыргызстанда банк ишин жүргүзүү жана салык тармактарында эң либералдуу шарттар түзүлгөндүгүн баса белгиледи.
Тамим Бин Хамад Аль Тани Кыргызстан менен Катардын окшоштугун, ошондой эле кыргыз-катар кызматташтыгынын чоң дараметин белгиледи. Катардын Эмири КР президентинин биринчи сапары эки тараптуу мамилелердин жаңы этабын ачканына ишеним билдирди.
Тамим Бин Хамад Аль Тани жакын арада Кыргызстанга экономика тармагында кызматташтыктын мүмкүнчүлүктөрүн изилдөөгө Катардан жумушчу топ бараарын маалымдады. Ал инфраструктура, айыл чарба жана туризм тармактарында катар тараптын кызыгуу жараткандыгын ырастады.
Мамлекет башчысынын дагы бир жемиштүү жолугушуусу — Катар инвестициялык башкармалыгынын аткаруучу директору Ахмад Мухаммад Аль Саед жана "Катар Холдинг" менен "Катар Дияр" компанияларынын жетекчилери менен болду.
Жолугушуунун жүрүшүндө Кыргызстан менен Катардын бизнес-түзүмдөрүнүн ортосундагы айыл чарба, энергетика жана өнөр жай чөйрөлөрүндө, ошондой эле транспорт жана логистика тармактарында долбоорлорду ишке ашыруудагы кызматташуунун келечеги талкууланды.
Иш сапардын жыйынтыгында президент Алмазбек Атамбаев менен Эмир Тамим Бин Хамад Аль Танинин катышуусунда дипломатиялык жана атайын паспорт ээлерин визалык талаптардан бошотуу, инвестицияларды колдоо жана коргоо, маданият, туризм, жаштар саясаты тармагында кызматташуу боюнча меморандум, келишимдерге кол коюлду.
Шейшемби күнү президент Алмазбек Атамбаевдин Араб дүйнөсүнүн өлкөлөрүнө – Сауд Аравиясына, Бириккен Араб Эмираттарына, Катар мамлекетине болгон сапары аяктады.
