Кышка даярдык тууралуу бир катар бийлик төбөлдөрү коомчулукка маалымат берип, даярдык шайма-шай дешкен эле. Ошентип, "табияттын жаман күнү болбойт" демекчи, биринчи кар да түштү. Шаардыктар, алардын ичинен өзгөчө, бөбөктөр кардын биринчи жаашына чын дилинен кубанышты. Бирок, социалдык түйүндөрдө калаанын тургундары менен меймандары жолдун тайгактыгы, көчөлөрдүн кардан тазаланбай жатканын жаза баштады. Ал эми мэриянын басма сөз кызматы тазалоо, кум чачуу иштери тууралуу маалымат таратты. Кечинде 16 атайын техника Бишкектин башкы көчөлөрүн тазалап, унаа жолдоруна кум, туз чача башташкан. 26-ноябрда эртең мененки саат 7.30да шаардык кызматтын мобилдүү топтору 552 тонна кум жана 42 тонна туз чачып чыгышты. Буга кум чачуучу 18 техника, 4 жүктөгүч, тротуар тазалоого 5 трактор колдонулуп, "Тазалык" ишканасынын 32 жумушчусу тартылган.
