БИШКЕК, 26-ноя — Sputnik. Ош облусунда күчү 2,5 баллга жеткен жер титирөө бүгүн саат 09:32де катталганын Улуттук илимдер академиясынын Сейсмология институтуна шилтеме берүү менен Өзгөчө кырдаалдар министрлиги билдирди.
Сейсмология институтунун алдын ала берген маалыматына ылайык, жер титирөөнүн очогу Кыргызстандын аймагында катталып, Ош облусундагы Жаңы-Жер аймагынан 2 чакырым батышта, Большевик айылынан 3 чакырым чыгышта, Кара-Суу айылынан 15 чакырым түштүк-чыгышта, Ош шаарынан 25 чакырым түндүк-чыгышта орун алган.
Алдын ала маалыматтарга караганда, кыйроолор жана адам өлүмү катталган жок.
Жердин силкинүүсү Жаңы-Жер, Большевик айылдарында 2,5 балл, Кара-Суу жана Куршаб айылдарында 2 баллга жеткен.
Белгилей кетсек, 14-ноябрда Ысык-Көл облусунда күчү 7 баллга жеткен жер титиреген.
