БИШКЕК, 28-мар. — Sputnik. Бүгүн, 28-мартта, COVID-19 вирусун жуктургандардын саны боюнча Италия экини орунга чыгып, Кытай менен орун алмашты. Бул тууралуу Жон Хопкинс атындагы университеттин Системалуу изилдөө жана инжиниринг борборунун сайтынан көрүүгө болот.
Кечээ биринчи орунга АКШ чыккан эле. Бүгүн эртең мененки маалымат боюнча, Америкада коронавируска 104 463 киши кабылды. Алардын арасынан 1702 киши көз жумуп, 890 киши сакайды. Италияда 86 498 кишиге жукса, 9 134 киши көз жумуп, 10 950 адам жакшы болуп кетти. Кытайда мурдагыдай эле 81 миңдин тегерегинде кармалып турат. Каза тапкандар — 3 299, жакшы болуп кеткендер — 75 091 киши.
Ал эми жер жүзү боюнча ага кабылгандардын саны 597 072 болду. Өмүрү менен кош айтышкандар — 27 360, айыккандар — 131 698ге чамалап барды.
Коронавирус тууралуу
2019-жылдын декабрь айынын аягында Ухань шаарында белгисиз өпкө оорусу жайылып баратканы байкалган. Оору деңиз азыктарын саткан базардан тараган. Адистер дарттын козгогучу коронавирустун 2019-nCoV деп аталган жаңы тиби экендигин боолголошкон. 11-март күнү Дүйнөлүк саламаттыкты сактоо уюму коронавирус боюнча дүйнөдө пандемия жарыялаган. Учурда вирус 200дөй өлкөгө жайылды, ага каршы вакцина табыла элек.
Баса, буга чейин коронавирус алгач кимден аныкталганы боюнча да маалымат жарыяланган.
