БИШКЕК, 27-мар. — Sputnik. Өзбекстандын президенти Шавкат Мирзиёев коронавирус жуктуруп алган бейтаптар менен иштеп жаткан медициналык кызматкерлердин айлыгына кошуп ай сайын кошумча акы төлөө боюнча токтомго кол койду. Бул тууралуу Sputnik Өзбекстан кабарлады.
Документте жазылгандай, кошумча акы карантин мезгилинде коронавирус жуктуруп алган бейтаптар менен иштеп жаткан медициналык кызматкерлерге, санитардык-эпидемиологиялык кызматта иштегендерге жана бул инфекцияны аныктаган лаборатория кызматкерлерине төлөнөт.
Атайын төлөмдөр 14 күн сайын берилип турат. Кайсы дарыгер канча алары документте так жазылган.
- Дарыгер, лаборант — 2600 доллар;
- Орто медициналык персонал, медайым-лаборант — 1500 доллар;
- Кичи медициналык персонал — 1000 доллар;
- Башка кызматкерлер — 500 доллар.
Мындан сырткары, COVID-19 вирусун жуктуруп алган бейтаптар менен иштеп жатып бул вируска кабылып калган дарыгерлерге бир жолу 10 миң доллардан акы төлөнөт.
"Эгер вирусту жуктуруп алган дарыгер оор абалда болуп, коронавирус анын ден соолугуна залакасын тийгизсе, медициналык кызматкерге же анын жакындарына 26 миң доллар төлөнүп берилет", — деп жазылган токтомдо.
Акыркы маалыматтар боюнча, Өзбекстанда коронавирус жуктуруп алгандардын саны 65ке жетти. Анын 11и медициналык кызматкерлер.
