19:36 05 Кулжа 2020
Түз эфир
  • USD74.2343
  • EUR84.1186
  • RUB1.0816
Видео

"Ооруну жеңип 90го чыгам" дечү эле... Элмирбек акын түбөлүк жайга узады. Видео

Кыскача шилтеме алуу
Акын Элмирбек Иманалиевдин каза болушу (11)
3359 0 0
© Sputnik / Эмиль Садыров

Бүгүн көп кырдуу таланттын ээси Элмирбек Иманалиев акыркы сапарга узады. Алп акындын акка моюн сунушу кыргыз эли үчүн орду толгус жоготуу болду.

Ак таңдай акын менен коштошуу зыйнаты Бишкектеги үйүнүн алдында болду. Өлкөдөгү эпидемиологиялык абалдан улам ага жакын адамдары гана катышып, талантын сыйлаган эли топурак сала албай калды.

Бийлик өкүлдөрүнөн маданият, маалымат жана туризм министри Азамат Жаманкулов жана Жогорку Кеңештин депутаттары катышты. Ал эми мамлекет башчы Сооронбай Жээнбековдун атынан кеңешчиси Султан Раев барып көңүл айтты. 

"Президент өзү ушул жерге келип Элмирбек инисинин башында турайын деп чын жүрөктөн чыккан тилегин айтты эле. Бирок эми өзүңүздөр билип турасыздар, кырдаал бүгүн башкача", — деди Раев. 

Жогорку Кеңештин депутаты,  "Айтыш" коомдук фондунун негиздөөчүсү Садык Шер-Нияз бул дүйнөдөн далай залкарлар өткөнүн, өлүм ак экенин моюндап, бирок Элмирбек Иманалиев жаш бойдон кете бергенине каңырыгы түтөп, көз жашын тыя алган жок.

"Кезинде Улукбек, Омар Хайям, Баласагын, Махмуд Кашгари өтүптүр. Бирок жок дегенде 50 жашка чыкса эмне?.. 50 жаш тою болгондо кыргызга дүңгүрөтүп той кылбайт белек. Кыргыздын улуу инсаны, кыргыздын сөзүн аздектеген, кыргыздын көтөргөн кылычы, сундурган найзасы Элмирбек деп жети дубанды кыдырып той берсек жарашпайт беле. 42 жаш деген эмне?! Карачы, кирейин десең жер бүтүн, өлөйүн десең көр бүтүн болуп турабыз. Элмирбек ырдын пири болуп, кайсы жерге барбасын улуу кыргызды даңктап, улуу сереге жеткирип жүрдү", — деди Шер-Нияз.

Ал эми акындын санаалашы, жакын досу Жеңишбек Жумакадыр көөдөндөн чыккан муңун ырга салып айтып берди. 

Алыстап бизден бекиндиң, досум,
Арманга салып эзилдим, досум.

Айтышарга жанымда сен жок,
Азыр мен билсең жетиммин, досум.

Ажалдан алып кала албай,
Алсызбыз, бизди кечиргин, досум.

Замандын айткан чындыгын, Элмир,
Санатың жашайт миң кылым, Элмир.

Жылт эткен өмүр бизде да бүтөт,
Жылмайып тосуп тургунуң, Элмир.

Коштогон арман кургурум, Элмир,
Кош болгун досум булбулум, Элмир.

Ак таңдай акындын шакирти, "Айтыш" коомдук фондунун төрагасы Асылбек Маратов устаты кант диабети менен көп жылдан бери алышып жүргөнүн айтты.

"Буюрса, бул ооруну жеңем, мен токсонго чыгам", — деп калчу. Биз дагы "Кудай буюрса, мыкты аксакал болосуз, казактын Жамбылы деле 100 жашка чыккан экен, кыргыздын Элмирбеги кантип 100гө чыкпасын" деген тилектерди айтчу элек. "Элмирбек эмнеден өлдү?" десе, жердин, элдин кайгысынан өлдү дейбиз. Ал жерибиз сатылып, элибиз тентип кеткенин ойлоп, бийликке далай кайрылуу жасап жүрдү. Жакшы сөзүн да арнады, аягында катуу сындап да, каргап да көрдү. Бул кишини тек гана өнөрпоз же эл артисти деп айтпастан, Кыргыз эл баатыры десек болот. Устатыбыз жөнүндө ырдай турган ырыбыз дагы, айта турган сөзүбүздүн баары алдыда", — деп эскерет шакирти.

Элмирбек Иманалиевдин сөөгү "Ала-Арча" көрүстөнүнө улуу инсандар Муса Баетов, Тууганбай Абдиев жана Ашыралы Айталиевдин жанына коюлду.

Акын оорудан улам 42 жашында акка моюн сунду. 20-апрелде кечинде ооруканага түшүп, тилекке каршы, ак халатчандар аны сактап кала алган эмес. Артында үч уул, үч кызы жоктоп кала берди.

Элмирбек Иманалиев кыргыз-казак элине аттын кашкасындай таанымал акын, КРдин эл артисти наамын алган.

Анын төкмөлүктөн тышкары обончулук, акындык, манасчылык өнөрдү аркалаган көп кырдуу талант болчу. Нечендеген шакирт даярдап, азыркы төкмөлөрдүн сап башындагы алп акын эле.

Залкардын элине калтырып кеткен мыкты чыгармалары, мукамдуу ырлар ага экинчи өмүр берери талашсыз.

Тема:
Акын Элмирбек Иманалиевдин каза болушу (11)

Тема боюнча

Күйдүргөн, күлдүргөн, күттүргөн Элмирбек. Үзөңгүлөштөрүнүн эскерүүсү
Айылга кат. Кермек сүйлөп ыр айткан, кер какшыгын кылайткан Чоңколорум аманбы?
Белгилер:
талант, төкмө акын, акыркы сапар, коштошуу, Элмирбек Иманалиев

Дагы видео

ЭҢ МААНИЛҮҮ