10:12 07 Бештин айы 2019
Түз эфир
  • USD69.8490
  • EUR77.5883
  • RUB1.0962
Видео

Чачтан портрет тарткан Умар. Сүрөтчү болбой калган чач тарачтын өнөрү видеодо

Кыскача шилтеме алуу
241710
© Sputnik / Эмиль Садыров

Умар Мажитов бала чагында сүрөтчү болууну кыялданган. Бирок ал жашоо шартына жана ата-энесинин каршылыгынан улам жактырган кесибин аркалай алган эмес. Анан ал чач тарач кесибин тандайт да курска жазылып окуудан өтөт. Бул кесип менен иштеп жатканына быйыл алты жылдын жүзү болду.

Канткен менен дээриндеги талант Умарды тынч койбогонун айтат. Акыры ал өнөрү менен кесибин айкалыштыруу жолун тапкан. Ал кардарларынан калган чачтын кыркындысынан портрет тартууда. Мындай өзгөчө ыкманы колдонуу менен Кыргызстандын жана дүйнөнүн белгилүү инсандарынын элесин түшүргөн. Анын ичинде кино жылдыздары Мэрлин Монро, Брюс Ли, рэпер Тимати жана индиялык лидер Махатма Ганди бар.

Бул ирет Умар өзү иштеген чач тарачтын полуна Кыргызстандын көрүнүктүү актеру, сүрөтчүсү Сүймөнкул Чокморовду тартты. Анүчүн Sputnik Кыргызстан агенттигинин кабарчысы Эламан Карымшаковдун да чачын колдонду. Бирок анын чачы жеткен жок. Анткени бир сүрөткө 4-5 адамдын чачы керектелет экен.

"Сиздерге Сүймөнкул Чокморовдун портретин тартканым да жөн жерден эмес. Ал мени аябай шыктандырат. Өзү да сүрөтчү болгондуктан аны тартуу мага жагымдуу. Кесибиме хоббимди кантип айкалыштырам деген ой мени алты жыл кыйнады. Кээде түшкөн чачтарды ары-бери басып тебелеп жүрсөм бир сүрөткө окшоп калат. Акыры былтыр ушул идея жаралып алты ай мурда ишке ашырдым. Башында кайчы, жүрөкчөгө окшогон нерселерди тартып жүрдүм. Эң биринчи Мэрлин Монронун элесин түшүргөм", — деди Мажитов.

Ал сүрөттөрдү жумуш ордундагы полго тартып кайра шыпырып салат. Атайын тактайчага түшүргөндөрүн дубалына илип, кардарларынын назарына койгон.

"Жакынкы күндөрү чач менен тартылган портрет, пейзаждарды көбөйтүп көргөзмө уюштурайын деп жатам. Акырындык менен түстүү сүрөттөргө да өтүү планым бар. Анүчүн шаардагы кесиптештеримден жардам сурап түстүү чачтарды чогултам. Өзүм Баткен районунун Айгүл-Таш айылында чоңойдум. 7-классымда райондо сүрөт мектеби ачылып, ага барам дегенде атам каршы болуп койгон. 11-классты бүткөндө Бишкекке келип Сүрөт академиясына тапшырайын десем да ата-энем каршы болуп ага да окубай калгам. Анан Кыргызстан эл аралык университетине тапшырдым. Кийин курска тапшырып чач тарачтыкты үйрөндүм", — деди сүрөтчү.

Белгилей кетсек, Умар Мажитов учурдагы кесибинин да майын чыгара жасайт. Буга чейин бир нече конкурстарга катышып келген. Өткөн жумада ал Бишкектеги "Best Barber — 2018" чач тарач искусствосу боюнча эл аралык чемпионатка катышып 3-орунду алган.

Тема боюнча

Азамат Жаналиев: Монголиянын президенти мык жана жиптен жасалган сүрөткө таң калды
Бомбанын калдыктарын гүлгө айландырган израилдик уста. Видео
Бишкектик сүрөтчү келин эне жөнүндө эмгектери менен интернетти жарды. 10 сүрөт
Белгилер:
жумуш, өнөр, сүрөтчү, портрет, чач тарач, Умар Мажитов

Дагы видео

ЭҢ МААНИЛҮҮ