Сүмөлөк кантип даярдалат? Аны жасоо ыкмасы

Жазылуу
Күн менен түн теңелген Нооруз майрамы Улустун улуу күнү деп аталат. Бул күнү улуттук тамак-аш жасалып, оюндар ойнотулуп эл шаан-шөкөттүн үстүндө болот. Жаңы жылда дасторкон үстүн мандарин менен оливьесиз элестете албагандай эле Ноорузда сүмөлөк жасабай коюуга мүмкүн эмес.

Улуу тамактын жасалыш ыкмасын адамдардын баары эле биле бербесе керек. Андыктан Sputnik Кыргызстан агенттиги буудайды өндүргөндөн тарта, аны бышырганга чейинки жасоо ыкмасын видеого тартып, тарыхына токтолду.

Аламүдүн районунун Прохладное айылынын тургуну Жумагүл Боталиева 7-8 жылдан бери сүмөлөк жасап, аны даярдоону салтка айландырып алган.

"Мурда башкалардын жасаганын көрүп суктанып койчумун. Кийинчерээк бул тамактын тилеги жакшы экенин элден угуп өзүм да жасап көрүүнү чечтим. Алгач өзүбүзгө чакан кылып жасап баштасам, кийин кошуналар менен чогуу Нооруз майрамына даярдай баштадым. Сүмөлөк жасалган үйгө ырыскы, кут кирип иши оңолот деп айтылып жүрөт. Токчулуктун символу болгон бул тамакты даярдагандан өзүм да ырахат алам", — деди ал.

Боталиева сүмөлөктү үйдөн жасабаса да, ар бир адам аны сатып алып же майрамдык иш-чаралардан тилек айтып ооз тийип койсо ашыкча болбой турганын кошумчалады.

"Сүмөлөк жасоонун дагы бир максаты — элдин башын бир казанга бириктирип, биримдикке, ынтымакка чакыруу. Аны бышырган түнү ар түрдүү оюн-зоок уюштурулуп, адамдардын маанайы көтөрүлөт. Бул майрам менен түрк тилдүү эл эски жылды узатып, жаңы жылды тосуп алышкан", — деди Жумагүл эже.

Сүмөлөктүн тарыхы

Празднование Нооруза на площади Ала-Тоо в Бишкеке - Sputnik Кыргызстан
Жаздын деми, кубанычка толгон жүздөр. Бишкектеги Нооруз
Тилеги ак тамактын тарыхына токтоло кетсек, сүмөлөктүн келип чыгышы жөнүндө ар кандай уламыштар айтылат. Анын биринде өткөн заманда, жаркыраган жаздын алгачкы айында калкты ачарчылык каптаганы, энелердин айласы кетип, ар кимиси колдорунда болгон тамак-ашын ортого чыгарып, бирөөсү бир чымчым ун, экинчиси бир кашык май, дагы бири талкан кылып казанга салып аралаштыра баштаганы айтылат. Бир убакта казан кайнайын деп калганда көп балалуу жесир аял келип "менин эч нерсем жок" деп казанга тогуз тоголок ташын салган имиш.

Казан кайнап, аны аралаштырган сайын апалар элге токчулук, молчулук, тынччылык келсин деп тиленет. Таң сүргөндө казандагы аралашма даамдуу тамакка айланып, сүмөлөк деп аталып калган деген уламыштар бар.

Майрамдык сүмөлөктү кантип жасоону Sputnik Кыргызстан инфографикасынан көрүңүздөр>> 

Жаңылыктар түрмөгү
0