БИШКЕК, 4-июн. — Sputnik. 12-июнда Россиянын Сергиев Посад шаарында Чыңгыз Айтматовдун кубогу үчүн көк бөрү боюнча эл аралык мелдеш өтөт. Ага Кыргызстандын атынан бир команда барат. Бул туурасында Жаштар иши, дене тарбия жана спорт агенттигинен билдиришти.
Турнирдин максаты - кыргыз-орус мамилелерин чыңдоо, улуу жазуучу Чыңгыз Айтматовду эскерүү жана көчмөн элдин оюну болгон көк бөрүнү жайылтуу экендиги белгиленген.
Спорт агенттигинин маалымат катчысы Нурдин Султамбаевдин айтымында, аталган мелдеште өлкө намысын орус улутунан куралган "Атуул" командасы коргомокчу.
Бул туурасында команда дагы Instagram баракчасына видео жүктөгөн.
Посмотреть эту публикацию в Instagram
Уюштуруучулар спортту өнүктүрүүгө салым кошкон аймак аралык коомдук фонд, Россия элдеринин ассамблеясы, КРдин Көк бөрү федерациясы болуп саналат.
Жеңүүчүлөр Чыңгыз Айтматовдун кубогу менен сыйланса, катышуучулар сувенирлерге ээ болору айтылды.
