Сүйүнчү! Кыргызстандын футболчулары биринчи жолу Азия чемпионатында ойнойт

БИШКЕК, 22-мар. — Sputnik. Кыргызстандын футбол боюнча курама командасы Мьянма менен беттеште жеңишке жетип, 2019-жылы өтө турган Азия чемпионатында ойной турган болду.

Биринчиликтин тандоо туру Түштүк Кореянын Инчхон шаарында өттү.

Оюндун экинчи мүнөтүндө эле Ислам Шамшиев гол киргизди. Ал эми үч мүнөт өткөндөн кийин Антон Землянухин топту дарбазага киргизип, биринчи тайм 2:0 эсебинде Кыргызстандын пайдасына аяктады.

Экинчи тайм башталганда Землянухин дагы бир гол киргизип, ата мекендик курама команда 3:0 эсебинде алдыга чыкты. Кийин мьянмалыктар бир топ киргизүүгө жетишсе, кыргызстандыктар жооп катары дагы эки гол салып 5:1 эсебинде жеңишке жетишти.

Бул жеңиш Кыргызстан курама командасын 2019-жылы Бириккен Араб эмирлигинде өтө турган Азия чемпионатына жолдомо алууга шарт түздү. Кыргызстан ал чемпионатка биринчи жолу катышмакчы.

Ата мекендик курама топ 27-мартта Индия менен ойнойт. Улуттук команда жеңилип калган учурда да жолдомо жокко чыгарылбайт.