Бишкек мэри таштандыны рекультивациялоо келишими эмнеге бузулганын түшүндүрдү

© Фото / Пресс-служба мэрии Бишкека/ Улукбек ШамбетовБишкек шаарынын мэри Айбек Жунушалиев. Архив
Бишкек шаарынын мэри Айбек Жунушалиев. Архив - Sputnik Кыргызстан, 1920, 07.10.2021
Жазылуу
Евразиялык реконструкция жана өнүктүрүү банкы рекультивацияга 22 миллион евро бөлгөн, анын 10,5 миллиону сарпталган.
БИШКЕК, 7-окт. — Sputnik. Бишкек шаарынын мэри Айбек Жунушалиев таштанды полигонун рекультивациялоо боюнча долбоорду ишке ашырып жаткан компания тийиштүү көлөмдөгү ишти аткарбай жатканын билдирди.
Анын айтымында, Евразиялык реконструкция жана өнүктүрүү банкы рекультивацияга 22 миллион евро бөлгөн, анын 10,5 миллиону сарпталган.
"Баарыбыз эч нерсе өзгөрбөгөнүнө күбө болуп жатабыз. Тендерди өткөрүүгө байланыштуу бардык маселелерди көтөрдүк. Эстониялык компаниянын конкурста жеңгени бизди абдан таң калтырды. Себеби сайттарды карап көрүп буга чейин тиричилик таштандылары жана таштанды полигону менен иштешкенин таба албай койдук. Бирок алар тендерден утуп кеткен. Бир дагы иштин тийиштүү көлөмү аткарылган жок. Мындан улам эстониялык компанияга келишимди бузуу боюнча билдирүү жөнөттүк", — деди мэр.
Бишкек шаарынын таштанды таштоочу жайы. Архив - Sputnik Кыргызстан, 1920, 26.09.2021
Мэр Жунушалиев өчпөй күйүп жаткан таштанды полигонун текшерди. Сүрөт
Калаа башчысы юридикалык процесстер чоюлуп жатканын айтып, подрядчы компаниянын багыттарынын бири юридикалык кызмат көрсөтүү экенин белгиледи. Ал ошондой эле маселе укуктук талаада чечилерин жана полигон "экологиялык коркунуч" жараткан абалда турганын кошумчалады.
Мэр белгилегендей, эстониялык компанияны инвестор деп айтуу жаңылыштык. Себеби алар ишке бир тыйын салган эмес. Компания подрядчы жана аткаруучу болуп эсептелет.

Полигон окуясы

2017-жылдын 10-июлунда мэрия таштанды полигонун жаап, андагы таштандыны рекультивация жасоо үчүн эстониялык Ehitusfirma Rand Ja Tuulberg AS компаниясы менен келишим түзгөн. Келишимдин суммасы 1 миллион 596 миң 900 евро болчу.
2021-жылдын 11-июнунда "Бишкек санитардык полигону" муниципалдык ишканасынын директору Адил Назаров Бишкек шаардык таштанды жайынын рекультивация иштери токтотулганын Sputnik агенттигине билдирген.
"Жаңы полигондун курулушуна 7,5 миллион евро, кийин дагы 1,5 миллион евро бөлүнмөк. Келишимге ылайык, биз эстониялык кесиптештерге таштандынын бардыгы рекультивация болгондон кийин каражатын төлөп беришибиз керек болчу. Бирок подрядчылар инфляция болуп күтүлбөгөн чыгымдар көбөйгөнүнө байланыштуу кошумча дагы 1 миллион 300 евро төлөп берүүнү суранышты", — деген Назаров.
Ал бул сумманы суроого негиз жок экенин айтып, маселе боюнча даттануу үчүн юристтер чакырылганын кошумчалаган.
Жаңылыктар түрмөгү
0